பின் இரவைக் கொன்று தின்ற பிலடெல்பியா- திடுக் திடுக் கதை!

என் மூச்சுக் காற்றில் உஷ்ணம் கலந்திருக்கிறதே. அதற்கான காரணம் தெரியாதவனாக நான் தவிக்கிறேனே, ஏன்??

ஓ அவளின் நினைப்பினால் தானே.

மௌனங்களால் மட்டும் உன்னை அடைந்து விட முடியும் என நான் கனவு கண்டு கொண்டிருந்த பொழுதுகளிலிருந்து உன் மீதான எனது மயக்க நிலையினைத் தெளித்தாயே, நீ யார்? வாய்க்குள் நுழைய முடியாத பெயர் கொண்ட உன் நினைவுகள் இன்னும் என்னை வருடிச் செல்கிறதே! மீண்டும் மீண்டும் என் நினைவுச் சுமைகளை அதிகமாக்கி உன்னைப் பற்றி எண்ண வைக்கிறாயே யார் நீ....

உன்னைப் பற்றி இராத்திரிப் பொழுதுகளில் எழும், இவ்வாறான கேள்விகளோடு என் நாட்கள் நகர்ந்து கொண்டிருந்தன. தூக்கம் என்னைத் தழுவிச் செல்லத் துடிக்கும் நேரங்களில் போர்வையினை இழுத்துப் போர்த்திக் கொள்ளும் போது, அருகே வந்து, ‘What are you doing Honey? செவ் இதழ் கலந்த அழகிய அலங்கரிக்கப்பட்ட புருவங்கள் கொண்ட உன் முகம் காட்டி, என் மூச்சில் புரையேற்றிற் செல்லும் போது தான் உன்னைப் பற்றிய என் சிந்தனை முழுவதும், நீ போகும் பாதையினைப் பின் தொடர்ந்து சென்றது. 

நினைக்கையில் நின் முகம் காட்டி வந்து, உறங்கையில் உயிரில் உணர்வேற்றி தன் வழி மறையும் செவ் இதழ் நங்கை நீ என நான் ஒவ்வோர் நாளும் நினைத்திருப்பேன். காலில் கொலுசோடு நீ வந்திருந்தால்...உன் வருகையினை முற் கூட்டியே அறிந்து இதய வாசலெங்கும் உனக்கான பூக்கள் பரப்பி இமை மூடாது காத்திருப்பேன் அல்லவா. சொல்லாமல் கொள்ளாமல் நீ வந்து என்னுள் கிளு கிளுப்பூட்டி விட்டு அருகே இருக்காது ஆசையினைக் கூட்டி விட்டு, மனதை அலையவைத்தல்லவா நீ செல்கிறாய்.

’You are a naughty guy? Why did you touch there? என்று என்னைப் பார்த்து நீ கேட்கும் போது தான் புரிந்தது. நான் உன்னைத் தொடாமலே தொடுவது போன்ற ஸ்பரிச உணர்வின் மூலம் என்னைப் பற்றிய நினைப்பு உன்னிடத்தே ஆழப் பதிந்து விட்டது எனும் உண்மையும்; 

உன் பெயர் கேட்கும் போதில், மெதுவாய் உயிரில் உஷ்ணமேற்றி விட்டு என் உயிர் நாளங்களில் இளமைத் திராவகம் ஊற்றி விட்டு,  என்னைத் தவிக்க விட்டுச் செல்லும் ஒவ்வோர் நிமிடங்களிலும், உன் பெயர் கேட்க நான் எத்தணிக்கும் போது, உன் செவ் இதழில் படிந்திருக்கும் சிகப்பு மையினை என் வாயோடு வாய் வைத்து ஒட்டியதற்கு அடையாளமாய் விட்டுச் செல்வாயே, அதன் பின்னர் நான் படும் வேதனையை எப்படிச் சொல்லி அழுவது?

அன்றும் போர்வையினை இழுத்துப் போர்த்திய அதே கணத்தில் ஜன்னலோரமிருந்த் திரைச்சீலை விலக்கி நீ வந்தாய். உன் சீண்டல்களுக்கு இன்று அனுமதி கொடுப்பதில்லை எனும் நினைப்பில், உன்னைக் கண்டும் காணாதவனாய் இழுத்துப் போர்த்திக் கொண்டு உறங்கி விட்டேன். மெதுவாய் என் போர்வை விலக்கி, உன் நெஞ்சோடு என் மார்பை நெருங்கச் செய்து, என் உடலில் புது ரத்தம் பாய்ச்ச நீ முனைந்த போது, எட்டி விலக்கி, உன் பெயர் கேட்டேன்.  கோபங் கொண்டாய். பிலடெல்பியா எனச் சொல்லி விட்டுப் மறைந்து சென்றாய். ‘சீஸ் கலருக்கும், மாஜரின் கலருக்கும் வேறுபாடு அதிகம் என்று தெரிந்தும், என் மீது ஆக்கிரமிக்க நினைக்கிறாயே, இதன் பொருள் என்ன? எல்லை கடந்த காதலா? அல்லது மொழி- இனம் கடந்த என் மீதான தேடலா என்று எத்தனை நாள் ஏங்கியிருக்கிறேன் தெரியுமா அன்பே?

உன்னை அன்று இழந்த சோகம் என்னை வாட்டும் வேளையில், ஏக்கம் எனும் உணர்வு கொண்டு மனம் தேம்பி அழுதது. உன்னைப் பற்றி அறியும் நோக்கில் என் தேடலை விரிவுபடுத்தினேன். உன் பெயர் சொன்னாய், உனக்கும் எனக்குமான உரையாடல்கள் மூலம் நீ ஒரு வெள்ளை இனப் பெண் என்று அர்த்தம் கற்பித்தாய். இனியும் தாமதமேன் என உன்னை அறிய முனைந்தேன்.

உதவிக்கு எனக்குத் தெரிந்தவராய் யோகா ஐயா பிரான்ஸில் இருக்கிறார் எனும் உண்மை உணர்ந்து அலைபேசி வழியே அழைப்பொன்றை மேற்கொண்டேன்.

ஐயாவும், அலைபேசி வழியே நான் ஒப்புவித்த கருத்துக்களைச் செவிமடுத்து, மகிழ்ச்சி கொண்டார். ஒரு பச்சிலர் பையனின் வாழ்வில் ஒளியேறப் போகிறதென்று புகழ்ந்து தள்ளினார், பெயரைக் கேட்டார். பிலடெல்பியா என்றேன். கொஞ்சம் நிறுத்து என்று கெஞ்சல் மொழி பேசினார். என் கனவில் காதல் மயக்கம் தந்த சம்பவங்கள் என நான் ஒப்புவித்த விடயங்களை மீண்டும் அசை போட்டார்.

‘அட நாசமாப் போவானே...நீ பிலடெல்பியா என்று கனவு கண்டது, வெளிநாடுகளில் பிரபலமான ஒரு Cheese ஐப் பற்றி என்று கன்னத்தில் ஓங்கி அறையாத குறையாக கடுந் தமிழில் ஏசினார். 

ஓவராக் கெட்ட வார்த்தைகள் அலைபேசி வழியே சராமரியான சொற்போர்த் தாக்குதல் போன்று என் காதுகளைத் துளைத்தெடுக்க என் அலைபேசி அழைப்பினை நிறுத்தி விட்டு, சபதம் பூண்டேன். இனிமேல் வீட்டில் வெளிநாட்டு நபர்கள் அன்பளிப்பாக, விடுமுறையினக் கழிக்ப்பதற்காக ஊருக்கு வரும் பொழுதுகளில் அறிமுகப்படுத்தும் புதிய உணவுகள் மீது அதிக பிரியம் வைக்கக் கூடாதெனும் உண்மையினை உணர்ந்து தெளிந்தேன். 

நனவென ஒன்றில்லை யாயின் கனவினால்

காதலர் நீங்கலர் மன்: திருக்குறள் எண் 1216

பொருள் விளக்கம்: நனவு என்று சொல்லப்படுகின்ற ஒன்று இல்லாதிருக்குமானால், கனவில் வந்த காதலி அல்லது காதலர் என்னை விட்டுப் பிரியாமல் இருப்பார்.

*********************************************************

புதிதாகப் பூத்த மொட்டு, விரைவாகப் போய்க் கை தட்டு:

பதிவுலகில் நாளாந்தம் பல புதிய பதிவர்கள் அதிரடியாக களமிறங்கிக் கொண்டிருக்கிறார்கள். இவர்கள் வரிசையில் இப்போது வந்திருக்கும் ஒரு பதிவர் தான் பிரணவன். தமிழகத்தின் மதுரை மாநகரில் இருந்து இணையவலையினூடாக; எழுத்துலகினுள் காலடி எடுத்து வைத்திருக்கும் இவர், தன்னுடைய குறுங் கவிகள் வாயிலாக நிறைவான பொருளைத் தரும் கவிதைகளைப் படைத்து வருகிறார். 

சிறிய கவிதைகளைத் தந்தாலும், நச்சென்று மனதில் ஒட்டிக் கொள்ளும் அற்புதமான கவிதைகளைத் தருவதில் வல்லவராக இருக்கும் பிரணவனை நாமும் சென்று வாழ்த்தி வரவேற்று, எம் ஆதரவினையும் அவர் பதிவுகளுக்கு வழங்குதல் சாலச் சிறந்ததல்லவா.

இதோ பிரணவனின் வலைப் பதிவு முகவரி: சில மணித்துளிகள்.

ஒடோடிச் சென்று பிரணவனுக்கு எம் ஆதரவினையு வழங்குவோமா உறவுகளே!!

Share