அவளுக்கு ஆட்டம் மெத்திப் போச்சு!

அன்பிற்கினிய உறவுகளே, வார்த்தைகளின் ஊடாக வர்ண ஜாலங்களைக் காட்டலாம், அதே போல வார்த்தைகளின் ஊடாக வசை பாடலினையும் செய்யாலம். அந்த வகையில் ஈழத்தில் வசை பாடலினைச் செய்யப் பயன்படுத்தும் சொற்கள் வரிசையில் பெண்களினைத் திட்டப் பயன்படுத்தும் ஒரு சில சொற்களினைப் பற்றி இப் பதிவினூடாகப் பார்ப்போம்.

வீட்டில் வயதுக்கு வந்த பெண் பிள்ளை ஒன்று , பெற்றோர் சொற் கேட்காது தன் வழியில் வீட்டை விட்டு வெளியேறி ஊர் சுற்றப் போகும் போது
’அவள் இனித் திருந்த மாட்டாள், அவளுக்கு ஆட்டம் மெத்திப் போச்சு’ என ஏசுவார்கள்.

ஈழத்தில் ஆட்டம் மெத்திப் போச்சு எனும் சொல்லிற்கு நிகரான அர்த்ததோடு தமிழகத்தில் ’கொழுப்பு ஏறிப் போச்சு’ எனும் சொல்லினை உபயோகிப்பார்கள்.

இதற்கு நிகாரான சொல்லாகத் தமிழகத்தில் ரொம்ப ஆடுறா எனும் சொல்லினையும் சில இடங்களில் பயன்படுத்துவார்கள்.

ஈழத்தில் ஒருவர் மேதாவித்தனத்தோடு தவறுகளைச் செய்யும் போது ‘அவருக்கு கொழுப்புக் கூடிப் போச்சு’ என்று ஏசுவோம்.

ஈழத்தின் வன்னிப் பகுதியில் பெரும்பாலான வீடுகளில் சுட்டித் தனமான தமது பெண் பிள்ளைகளைக் கண்டிக்கும் போதும், ஏசித் திட்டும் போதும்,
’உனக்கென்ன அமரே! என்று ஓர் வார்த்தையினையும் கையாள்வார்கள்.

அமர் எனப்படுவது இங்கே பல அர்த்தங்களில் வந்து கொள்ளும், உதாரணமாக ஒரு பெண் ஆண் மீது மோகம் கொண்டு வாடுகையில் அல்லது ஆண் மீது காதல் கொண்டு ஆணின் நினைப்புடன் இருக்கையில் உனக்கென்ன அமரே எனக் கேட்டால்- இது கெட்ட அர்த்தத்தில் வரும்.
அதே போலச் சுட்டித் தனம் செய்யும் பெண்ணிடம் கேட்கையில்’
இச் சொல்லானது ’’நீ என்ன திமிர் பிடித்த நிலையில் இருக்கிறாயா? என்ற தொனியில் பொருள் தரும்.

இதே போல ஈழத்தின் வன்னிப் பகுதியில் உள்ள சில பழசுகள் ‘இளவயதுக் குமரிகள்(பிகருகளை) குறும்பு செய்கையில் ‘நீ ஒரு டான்ஸ் மாலை’ அல்லது டான்சு மாலை’ எனப் பேசுவார்கள். இங்கே டான்ஸ் மாலை எனும் சொல்லிற்கான அர்த்தம் தமிழகத்தில் வழக்கிலிருக்கும் ஆட்டக்காரி எனும் சொல்லிற்கு நிகரானதாக வரும்.

டான்ஸ் மாலை- ஆட்டக்காரி. ஒரு பெண்ணினைத் திட்டும் போது ஈழத்தில் நீ ஒரு ஆட்டக்காரி என்று சொல்லியும் திட்டுவார்கள்.

நீ ஒரு சதிர் என்று ஈழத்தில் திட்டுவார்கள். இங்கே சதிர் என்பதற்கான அர்த்தம் குழப்படிகார(Naughty) பெண்ணின் செய்கையினால் ஆத்திரமுற்ற பெரியவர்கள் அவளை கட்டுக்கடங்காத பெண்ணிற்கு ஒப்பிட்டுப் பேசுவதைக் குறிக்கும்.
சதிராட்டம் எனும் சொல்லும் இதனோடு தொடர்புடைய ஒரு சொல் தான். இச் சொற்றொடர்கள் தொடர்பாக நீங்கள் அறிந்த விடயங்களையும் பகிர்ந்து கொள்ளலாமே,

Share